أطفال زمان
######
بقلم/ السيد عطاالله
الدولاب كان مسمار في حيطه
ناس مش بتوع منظره و زيطه
ناس بالفطره و عيشتهم بسيطه
لا كان في جنون بقر ولا شوطه
الأستاذ أستاذ وعمره ما كان مستر
ندين له بالحب نبوس إيده ونشكر
كانت الشنطه قماش للأقلام تبعتر
المريله أخر الأسبوع نخلعها لبحر تعكر
الكوتش كان باتا أبيض برباط
مش أميجو بينور على البلاط
ومن كان له جزمه فرح و زاط
أبو زيد خاله من كان بيته بلاط
كان الكتاب المدرسي شيق ولذيذ
و ترقينا شويه وجه سلاح التلميذ
كنا عباقره وشطار مع وقف التنفيذ
كنا نذاكر من غير أوامر و تنخيز
نيجي من المدرسه ع الغيط على طول
عايشين حياتنا ما نعرف لها عرض من طول
نحش برسيم للبهايم ولما نتعب ناكل فول
ناس طيبين مفيش بينهم ظالم أو جهول
ييجي الليل نذاكر دروسنا على لمبة جاز
أتخن ببت ما كان فيه تلاجه ولا بوتاجاز
الشباك كان فتحه بالحيطه مالها قزاز
والشرب من قله نشعر مايتها رذاذ
تعليقات
إرسال تعليق